वऱ्हाडाच्या मांडवातून अंत्ययात्रा निघणार
पुणे -तारीख आणि वेळही ठरली, लग्नाची तयारी झाली, हातावर मेहंदी ही रंगली, पै – पाहुण्यांची लगबग सुरू होती. वऱ्हाड लग्नस्थळी निघणार होतंच. तितक्यात नवरदेवाच्या कुटुंबियांना हादरवणारा व धक्का देणारी घटना घडली.लग्नाच्या दिवशीच नवरदेवाने विहिरीत उडी मारून आत्महत्या केली. ही धक्कादायक घटना मंगळवारी १६ एप्रिल रोजी सकाळी तळेगाव दाभाडे येथे उघडकीस आली आहे.
नवरदेवाने विहिरीत उडी मारून जीवनयात्रा संपवली असून ज्या मांडवातून वाजत-गाजत वऱ्हाड जाणार होतं, आता तिथूनच नवरदेवाची अंतयात्रा निघणार असल्याने संपूर्ण कुटुंबावर दुःखाचा डोंगर कोसळला आहे. नवजिवनाची सुरुवात होण्याआधी नवरदेवाने जीवनाचा अंत केल्याने नागरिकांनी हळहळ व्यक्त केली. नवरदेव व नवरी अशा दोन्ही कुटुंबियांवर दुःखाचा डोंगर कोसळला आहे.
सूरज रायकर या तरुणाचे मंगळवारी मोठ्या आनंदाच्या वातावरणात लग्न होणार होते. देहूगावात सायंकाळी साडे पाच वाजता सूरज विवाहबंधनात अडकून, नव्या आयुष्याची सुरुवात करणार होता. लग्नाची संपूर्ण तयारी झाली होती. तळेगावातील राहत्या घरासमोर मांडव ही टाकण्यात आला होता. याच मांडवातून सकाळी सुरजचं वऱ्हाड वाजत-गाजत जाणार होतं. सोमवारच्या रात्री या आनंदात सगळे झोपी गेले होते.
नवरदेव सुरजच्या मनात काय सुरु आहे याची साधू पुसटशी कल्पनाही कुटुंबातील कोणालाच नव्हती. सूरजने कोणाला काहीही न सांगता, पहाटे साडे चार वाजताचं घर सोडलं. काहीवेळाने कुटुंबातील सर्वांची लग्नस्थळी पोहचण्यासाठी लगबग सुरु झाली. पण सूरज कुठंय? हा प्रश्न निर्माण झाला आणि सर्वांची धांदल उडाली.
तितक्यात मामाचे लक्ष मोबाईलवर गेले, भाचा सुरजने एक मेसेज त्यांना पाठवला होता. “मला हे लग्न करायचं नाही, मी आत्महत्या करत आहे.’ असं त्यात नमूद असल्याचं पाहताच कुटुंबाला मोठा धक्का बसला. मग सर्वानी परिसरात सूरजला शोधण्याचा प्रयत्न केला, तेंव्हा घरापासून काही अंतरावर असणाऱ्या विहिरीजवळ गाडी अन काही वस्तू आढळल्या. यावरून सुरजने विहिरीत उडी मारली असेल, असा अंदाज बांधण्यात आला. विहिरीतील पाणी शेवाळलेलं होतं, त्यामुळं नेमका अंदाज बांधायला कोणीच तयार नव्हतं. वेळ पुढं सरकत होती, नवरी मुलीच्या घरचे देहूगावातील लग्नस्थळी वऱ्हाड घेऊन निघण्याच्या तयारीत होतेचं. तितक्यात सुरजच्या कुटुंबीयांनी घडला प्रसंग त्यांच्या कानावर टाकला आणि आम्ही पुढची घडामोड कळवेपर्यंत वऱ्हाड काढू नये, असं मुलीच्या कुटुंबियांना कळविण्यात आलं.
तळेगाव पोलिसांना ही याबाबतीत कळविण्यात आल्यावर त्यांनी मावळ वन्यजीव रक्षक पथकाला पाचारण केलं. त्यांनी विहिरीतील अशुद्ध पाणी बाहेर काढायला सुरुवात केली, तेंव्हा दुपारी अडीच वाजण्याच्या सुमारास सुरजचा मृतदेह आढळला. नवरी मुलीच्या कुटुंबियांना ही बाब कळविण्यात आली आजी नवजिवनाची गुलाबी स्वप्ने पाहणाऱ्या नवरीच्या स्वप्नाचा चुराडा झाला. या घटनेनं दोन्ही कुटुंबियांवर दुःखाचा डोंगर कोसळला आहे.
या प्रकरणाचा अधिक तपशील पोलीस तपासात पुढे येईलच पण ज्या मांडवातून नवरदेव व त्याच वऱ्हाड वाजत गाजत जाणार होतं, तिथूनच सुरजची अंत्ययात्रा निघणार आहे.जिथे सनईचे मंजुळ स्वर घुमणार होते तेथे दुःखदायक आक्रोश होत असून नागरिकांकडून दुःखद हळहळ व्यक्त केली आहे.
