Tuesday, July 16, 2024
Homeइतरलग्न वेळेत लावता येत नसेल तर मुहूर्त काढता कशाला... अहो वेळेचं महत्व...

लग्न वेळेत लावता येत नसेल तर मुहूर्त काढता कशाला… अहो वेळेचं महत्व पाळा राव पाव्हणं..

सांगा ना… लग्न मुहूर्तावर लागेल का… आम्ही वेळेत येऊन चूक केलीय का ? पै पाहुणे,आप्तेष्ट व मित्रपरिवार यांचाही वेळ महत्त्वाचा असतो…

कोरेगाव भिमा (ता.शिरूर ) सध्या सगळीकडे लग्नाचा सिझन सुरू आहे.कडाक्याच्या उन्हात घामाने हैराण  पै पाहुणे, आप्तेष्ट नातेवाईक व मित्रमंडळींना ताटकळत ठेवून उशिरा टाळी अर्थातच लग्न लावणे ही फॅशनच झाली आहे. या प्रथेविषयी सार्वत्रिक नाराजी व्यक्त होत असून लग्नाचा मुहूर्त अथवा वेळ टळून गेली तरी लग्न वेळेवर लागत नाही. लग्न तास दीड तास किंवा काही काही लग्न तर दोन तास उशिरा लग्न लागते, मग लग्न मुहूर्त काढतात तरी कशाला ?लग्नाला आलेल्या अनेकांचा वेळ महत्वाचा व मौल्यवान नाही का ? असा प्रश्न निर्माण होत असून लागणं मुहूर्तावर अथवा वेळेवर न लागल्याने समाजात मोठ्या प्रमाणात नाराजीचा सुर पाहायला मिळत असून वधू व वरपिता यांच्यासह कुटुंबाला टीकेला सामोरे जावे लागत आहे.

 हिंदू संस्कृतीमध्ये हा एक अतिशय महत्वाचा संस्कार आहे जर उभय वधू वर यांच्या जीवनाची सुरुवात उशिराने होत असेल तर पुढील जीवन निश्चित अवघड होऊ पाहतेय . पै – पाहुण्यांना आग्रहाचे निमंत्रण असल्याने लग्नाला न जाणे हे माणुसकीला धरुन नसल्याने विवाहांना जावेच लागते. तो माणुसकी धर्माचा भाग आहे. तसाच, आमंत्रित पाहुणे रिकामटेकडे किंवा बिनकामाचे नसतात याचे भान ठेवणे माणुसकीला धरूनच आहे. हे संबंधितांनी ध्यानात 

पुणे जिल्ह्यात यंदा उन्हाची तीव्रता जास्त असून सूर्य आग ओकत आहे. उकाड्याने हैराण करून सोडले असून आलेल्या  निमंत्रणाचा आदर राखत अनेक सामाजिक घटक यामध्ये डॉकटर ,वकील ,प्राध्यापक, उद्योजक, अधिकारी,नोकरदार, कामगार,  शेतकरी लग्न वेळेवर लागायची आतुरतेने वाट पाहत असतात. आपली कामे बंद करून वधूवर यांना शुभाशिर्वाद देण्यास आलेले असतात पण उशीर केल्याने त्यांच्या मनात नाराजी निर्माण होते. शेतकऱ्यांना गुरांचा चारा , गुरांच्या धारा काढायच्या असतात. शेतातील कामे असतात याचा तरी विचार करण्यात येईल का ? 

  सर्रास पने मुहूर्त टळून जातो, लग्न उशिरा लागते,  मग वरपिता आणि वरमाय या दोघा उभयतांच्या भेटी घेउन पाहुणे उपस्थित असल्याची हजेरी नोंदवतात.  मुहूर्त जास्त असल्याने पुढच्या लग्नासाठी गुपचूप काढता पाय घेतात, असेही प्रकर्षाने जाणवते.

उन्हाच्या कडाक्याने अंगाची लाहीलाही होत असतानाही नातेवाईक, आप्तस्वकीय मंडळी, सगेसोयरे वऱ्हाडी विवाहाला हजेरी लावतात. पण वर पिता-वधू पिता व नवरदेवाचे कलवरे व स्वागत करणारे अति उत्साही समालोचक यांना त्याचे काहीच सोयरसुतक नसते. येणाऱ्या पाहुण्यांची व त्यांच्या वेळेची काळजी नसते म्हणून तर अशा लग्नात उगाचाच पाहुण्यांना उन्हात थांबवून ठेवण्यात येते. विवाहाच्या आनंदात सामील होऊन वधूवरांना आशीर्वाद देण्यासाठी येणाऱ्यांच्या अडचणीची मात्र अनेकदा कुणालाच फिकीर नसल्याचे पाहायला मिळते. अलीकडे पदोपदी हे पाहायला मिळते.

मुहूर्त काढायचा तरी कशाला ? तब्बल दीड ते दोन तास उशिराने लग्न लागतात. पाच- दहा मिनीटांचा उशीर वऱ्हाडी समजून घेतात. मात्र तब्बल दीड-दोन तास उशीर होत असल्यास पाहूण्यांना मनस्ताप सोसावा लागतो. त्यातून वैतागून मुहूर्ताचे वेळा कशाला काढलीय असाही सवाल उपस्थित होतो. मुहूर्त पाळायचा नसेल तर हा देखावा म्हणावा लागेल, असेही एका नागरिकाने म्हटले आहे. उन्हातान्हात लग्नाला आलेल्या आप्त स्वकीयांचा विचार करुन लग्न वेळेत लागतील अशी अपेक्षा वऱ्हाडी मंडळी करीत आहेत.

तब्बल दीड ते दोन तास उशिराने लागतात लग्न कारण – मुहूर्त काढलाच तर मग दोन पाच मिनिटे इकडे की तिकडे समजू शकतो. लग्नाला तब्बल दीड-दोन तास उशीर होत असेल तर संबंधितांना वेळेची कदर नाही, असे दिसते. त्यामुळे मुहर्ताचे पाखंड कशाला? असाही सवाल उपस्थित केला जात आहे. मुहूर्त काढून पाळायचा नसेल तर हा ढोंगीपणाच म्हणावा लागेल, असेही एका नागरिकाने म्हटले आहे. लग्न हा आयुष्यातील एक अनमोल क्षण आहे, तसाच तो संस्कारदेखील आहे. हे वरपिता वधुपिता यांनी लक्षात घेण्याची गरज आहे. उन्हातान्हात लग्नाला आलेल्या आप्तस्वकीयांचा विचार करून लग्न वेळेत लागतील, अशी अपेक्षा वन्हाडी मंडळी करीत आहेत.

लग्न उशिरा लागण्याची लागण्याची काही प्रमुख कारणे –  महिलांचा मेकअप, तरुणांचे नृत्य व फोटोग्राफरची ॲक्शन मध्ये फोटो काढण्यासाठी धडपड यामुळे लग्नाचा मुहूर्त टळून जातो. त्यामुळे सध्या गंध लावणे, साखरपुडा, हळद लावणे हे कार्यक्रम शक्यतो लग्नाच्या आधी होतात. ही आनंदाची बाब असली तरी ठरलेल्या मुहूर्तावर लग्न लागणे ही बाब वधू-वरांसाठी शुभ असते. लग्नाच्या कोणत्याही कार्यक्रमात वऱ्हाडी मंडळींमध्ये महिला वर्ग मोठ्या प्रमाणात सहभागी असतो. लग्नात नटणे अगदी स्वाभाविक आहे. परंतु, त्यास होणारा विलंब हे देखील विवाह मुहुर्तावर लग्न न लागण्याचे एक कारण आहे. अनेकदा नवरदेवाचे विवाहस्थळी प्रवेशद्वारावर आगमन झालेले असताना देखील नवरी मुलगी ब्युटी पार्लरच्या महिलेकडून मेकअप करून घेत असते. अशा घटना सध्या वेळोवेळी निदर्शनास येताना दिसत आहे.

नवरदेवाच्या परण्याच्या मिरवणुकीतील डीजे सिस्टीम व नाचणारी मित्रमंडळी – दुसरा मुहूर्तला उशिर होण्याचे दुसरे कारण म्हणजे नवरदेवाच्या परण्याच्या मिरवणुकीत ठेवलेली डीजे सिस्टीम व त्यावेळी वराच्या प्रेमा खातर नाचणारी मित्रमंडळी यांना अनेकदा सांगून देखील ते विवाहाच्या ठिकाणी येण्यास उशीर करतात. त्यामुळे विवाह मुहूर्त टळून जातो, असे म्हटले तर काही वावगे ठरणार नाही.

शूटिंग व फोटो ग्राफर…थोडस हिकडे सरका ..हा आता स्माईल – व्हिडिओ शूटिंग व फोटोग्राफ करणाऱ्या कलाकारांचा वधू आणि वर यांच्या घरातून निघण्यापासून ते विवाहस्थळी पोहोचेपर्यंत अनेक ठिकाणी त्यांना वेगवेगळ्या पोजमध्ये उभे करून फोटो काढून शूटिंग घेतले जाते. त्यांच्या या पोजमुळेही विवाह मुहुर्तावर लग्न लागत नाहीत.चौथे आणि प्रमुख कारण म्हणजे वधू-वर विवाह स्थळी आल्यानंतर आलेल्या पाहुणे मंडळींचे स्वागत करणे. तसेच मान्यवरांचा सन्मान करणे. तसेच एखाद्या व्हीआयपीचा वाट पाहात बसणे, यामुळे देखील लग्नाचा मुहुर्त टळून जातो.

कोरोना काळातील लग्ने भारी होती – कोरोना काळातील लग्नच चांगली होती करोनाचे संकट जगावरती आले होते. त्यावेळी मर्यादित वऱ्हाडी मंडळीच्या उपस्थितीमध्ये विवाह सोहळे होत होते. त्यावेळी ना महिलांकडून मेकअप अटटाहास होता ना युवकांचा नाच, ना राजकीय नेत्यांचा सन्मान होता. त्यामुळे विवाह अगदी मुहुर्तावर लागत होते. त्यातून सोहळे साजरे करताना मिळालेली शिकवण व अनुभव अंगीकारले तर निश्चितच सर्वांचा फायदा होईल.

संबंधित लेख

LEAVE A REPLY

Please enter your comment!
Please enter your name here

ताज्या बातम्या

Recent Comments

error: Content is protected !!